Теҥгече кечывал кочкышым ышташ мӧҥгӧ ошкылмо годым Йошкар-Оласе ик кудывечыш пурымаште корнысо ий ӱмбалне йӧндымын шинчыше иктаж витле ияшрак ӱдырамашым ужым. Мо лийында манын йодмемлан «Мунчалтен камвозынам, йолем тугенам ала-мо, шогалын ом керт» йӧсынрак пелештыш. Ты жапыште тудын деке пӧръеҥ лишеме, «Вашке полышым» ӱжынам, чыталте,  писын толын шуэш» манын лыпландарыш.

Ола мучко кызыт тыгай сӱретше икте веле мо? Мынярын камвозыт, мынярынже, пиалеш, южышто кид-йол дене лупшкедылын, йол ӱмбалне пыкше шоген кодыт. Вет кызыт кушко от ончал – чыла вере ий мунчалтыш. Игечын левештен, кенета кылмыктымыже тидлан йӧным сайынак ыштен. Коммунальный служба еҥ-влакын коштмо корныш ошмам шавен огеш шукто. Поснак автобус, троллейбус шогалме верыште лӱдыкшӧ: ийлан кӧра транспорт тораштырак шогалеш, иян тайыл дене тудын марте шуаш – манаш веле. Самырыкше тӧршталтенат пура, а шоҥгыеҥже тидым ыштен огеш керт.

- Пытартыш кечылаште мемнан деке полышым йодын толшо-влак шукемыныт, - тазалыкым пӧртылтымӧ 5-ше номеран поликлиникыш йыҥгыртымеке мане медстатист Л.Сушенцова. – Еҥ-влак кидыштым, йолыштым эмгатат, вуйышт дене пералтше-влакат улыт.

Ик вере я вес вере  ошмам шавен коштшо машинам ужат гынат,  йолын коштмо корнышкыжо тудо шагал годым пура. Мунчалтен пуреҥгаяш огыл, эн шучкыжо – йолым, кидым тугаш огыл манын, еҥ-влаклан моткочак тӱткӧ лийман. Травматолог-влак иян корнышто изи ошкыл дене каяш темлат. Эскеренак шуктымо огыл гын, кидышке огыл, а ӧрдыжкӧ шуҥгалташ тыршыман. Кем пундашышке пластырьым, наждак кагазым пижыктен шындымат туткар деч утлаш полшышаш.

Л.Иванова.

М.Скобелевын фотожо.