Марий Эл Республикым вуйлатыше Леонид Маркелов «Spar Middle Volga» компанийын директор-влак ушем председательже Альберт Гусев дене вашлийын.

Пашаче вашлиймаш годым Марий Элын аграрный секторжо дене вашкылым ыштыме шотышто ятыр йодышым каҥашыме. Мутланыме деч вара «Spar» кевытлаште Марий Элын агропромышленный комплексшын сатужым шукырак ужалаш тӱҥалаш пунчалым лукмо.

Республикым вуйлатыше дене мутланымыж годым Альберт Гусев  республикыштына ямдылыме продукцийын сай качестван улмыжым палемден. «Spar» компанийын кокымшо кевытшым Йошкар-Олаште У ий пайрем деч ончыч почмо. Компаний вуйлатышын мутшо почеш, у кевытын пашам ыштыме икымше арняже-влак теве мом ончыктеныт: Марий Эл дене ыштыме кыл кок могыржылынат пайдале да ончыкылыкшо волгыдо. Гусев ӱшандарен каласен: Марий Элын сатужым вес регионлаште илыше-влакат кӱкшын аклат.

— Компанийын сетьше Россий Федерацийын ныл регионыштыжо 150 кевытым ушен шога. Ме ӱшанена: тушто Марий Элын сатуж дене кумдан палдараш да тудым ужалаш тӱҥалына.

В.Смоленцев.