Увер-аҥар: Ончыл йӧн – тӱҥ эҥертыш
У Торъял районысо «Первый май» ял озанлык артель, Оршанка районысо «Оршанка сельхозпром» ООО да «Родина» колхоз негызеш 2011-2012 ийласе теле жапыште вольыкым ашнен лукмо, тӱкан шолдыра вольык урлыкым саемдыме, кӱтӱм кугемдыме йодыш дене кылдалтше республиканский семинар-совещанийым эртарыме.
Марий Элыштына сурткайыкым да сӧснам ашныме паша ятырлан воранен каен гын, тӱкан шолдыра вольыкым ончышо-влакын тыршыме саскашт ок куандаре. Кодшо ийын гына тӱкан шолдыра вольыкым 9 процентлан шагалемдыме. Тыгай чырым чарен шогалташ огыл гын, тӱшка озан- лык-влак утларак кугу нелылыкыш логалыт. Ончыкыжым кузе лияш, туткар гыч кузе лекташ? Тыгай йодышлан вашмутым ончыл озанлык-влакын опытыштым шымлыме негызеш кычалаш тыршыме. Мутлан, У Торъял районысо «Первый май» артель ий еда кӱтӱм кугемден толеш, кодшо ийын кажне ушкаллан шотлымаште икымше гана вич тӱжем утла килограмм шӧрым лӱштен. Озанлык вуйлатыше, Кугыжаныш Погын депутат А.А.Новиков Тушнур фермыште тӱж ушкалым ашныме, Шӱвылакыште презым ончымо опыт дене палдарен.Пытартыш жапыште Оршанка район кажне ушкаллан шотлымаште лӱштыш шотышто республикыште эн ончыко лектын. Тыгай опыт чылалан пайдале. «Оршанка сельхозпром» ушемын Лужбеляк фермыштыже озанлык директор З.И.Михай- лова презым тыглай левашыште йӱштӧ йӧн дене ончымо нерген каласкален. А тысе ушкал фермын родильный отделенийышкыже видеокамерым вераҥдыме. Тыге презым ышташ ямдылалтше кажне ушкал шинча ончылно лиеш, да ветполыш жапыштыже пуалтеш, самырык вольык аралалт кодеш. А «Родина» колхозын Шулко комплексыштыже озанлык вуйлатыше Г.А.Прыгунова тӱжаҥдышаш тунам ашныме йӧн дене палдарен.
В.Смоленцев.
Возен admin- Онченыт: 188 гана
