Увер-аҥар: Верла гыч увер
«Яндар памаш» кумдарак лиеш
Екатеринбургышто илыше марий-влак шочмо йылмышт ден культурыштым вияҥдымаште ятыр тыршат.Олаште «Яндар памаш» ансамбльым чумыреныт. Тыгак Свердловск, пошкудо Тюмень областьыш, Башкортостаныш концерт дене лектыт, нине кундемыште илыше моло калыкым марий муро-куштымаш, модыш, пайрем йӱла дене палдарат. Ансамбльыш самырык да илалше коло наре еҥ коштеш. Йоча ансамбльым ышташ шонымашышт уло. Сандене кызыт 8-14 ияш ӱдыр-рвезе-влакым погымо нерген уверым пуэныт, уло кумылын шкешт деке ушнымыштым вучат.
Тудым калык ок мондо
Марий Турек районышто «Ме патриот улына» оборонно-массовый паша дене кылдалтше месячникым увертарыме.
Ты мероприятийым шочмын Марий Турек посёлкысо ял озанлык механизаций техникумышто Г.С.Савельевым шарныме лӱмеш мемориал оҥам почмо дене тӱҥалыныт. Григорий Семёновичын 1999 ий 2 апрельыште Таджикистан ден Афганистан чекыште боевой заданийым шуктышыжла, илышыже кӱрылтын. Герой нерген поро шомакым техникумын студентше-влак ончылно район администрацийым вуйлатыше В.Ю.Елкин, районым вуйлатыше Н.Н.Зангирова ойленыт.
Ешлан полыш кугемеш
Кодшо ийыште илыме вер да коммунальный услугылан субсидийым 36 тӱжем утла еҥ налын.
Тидыже республикыште илыше чумыр еш гыч 14,5 процент лиеш. Эн шукынжо, 13 тӱжем утла еш, Йошкар-Олаште ты полыш дене пайдаланеныт. Вара Волжск (4742 еш) да Козьмодемьянск (2097 еш) ола-влак каят.
Еҥ-влаклан тыгай социальный полышым пуаш республиканский бюджетыште ӱмаште 379 миллион наре теҥгем палемдыме ыле. Тудым тичмашнек кучылтмо. Ик ешлан кокла шотышто тылзыште 1256 теҥге дене логалын, а ончылий 1004 теҥге лийын.
Йодышда уло – йыҥгыртыза
Ял озанлык да продовольствий министерствыште 2012 ий 23 январь гыч ты органын полномочийже дене кылдалтше йодышым писын ончымо шотышто «Шокшо линий» пашам ышташ тӱҥалын.
Паша кечын республикыштына илыше-влак 8.00 шагат гыч 17.00 шагат йотке 45-29-55 №-ан телефон дене йыҥгыртен але Интернет гоч minselhoz@aris.mari.ru адрес дене йодышым пуэн кертыт. «Шокшо линий» дене пурышо йодышым регистрироватлат, законодательство дене келшышын, тудым рашемдыме пашам виктарен колтат. А йодышым пуышо еҥлан палемдыме жапыште вашмутым пуат.
Бизнес вийым налеш
Эртыше ийын Советский районышто изи да кокла кугытан бизнесыште 2,3 тӱжем утла еҥ тыршен.
Ты районышто ӱмаште изи кугытан 101 да кокла кугытан 3 предприятий, 506 индивидуальный предприниматель пашам ыштеныт. Бизнес умбакыжат вийым налеш. Ынде тӱрлӧ услугым пуымо, ял озанлык да промсатум ыштен налме, ужалыме да моло пашаште тудын ужашыже ий еда кугем толеш. Тыге талук жапыште изи да кокла кугытан предприятий-шамыч сату оборотым лучко процентлан кугемденыт да 1 миллиардат 278 миллион теҥгешке шуктеныт. Тылзаш кокла пашадар куд процентлан ешаралтын да 10,2 тӱжем чоло теҥгешке шуын.
«Усталык памашыш» ушнаш ямдылалтыт
28 январь гыч 24 март марте Йошкар-Олаште, Сеҥымашын ХХХ идалыкше лӱмеш тӱвыра полатыште, республика кӱкшытан «Усталык памаш» калык художественный творчество фестиваль эрташ тӱҥалеш.
Звенигово районышто фестивальлан кызыт поснак чот ямдылалтыт, вет ты кундемыште илыше-влак шке мастарлыкыштым вес шуматкечынак, 4 февральыште, ончыктат. Тиде амал дене районысо ял шотан илемлаште талантан еҥ, коллектив ден ансамбль-влакым ойырен налме паша ончыгече, 26 январьыште, Кужмарийыште пытартыш лийын. А 29 январьыште Звенигово районысо тӱвыра да каныме рӱдерыште иктешлыше концерт лиеш. Тиде программымак Йошкар-Олаште ончыктат.
Возен admin- Онченыт: 198 гана
