Врач кеч-могай кугу опытан, тале специалист лийже, чын диагнозым шындаш манын, тудо черле еҥым садак эн ондак вӱрым  тергаш колта, вет лач тудын дене чер улмым, кузе вияҥмыжым раш пален налаш лиеш. 

Ик случай шарналтеш. Вӱрым сдатлымеке,  анализ изи йочан С гепатит улмым ончыктен. Кушеч тыгайже – чыланат моткоч ӧрыныт. Ты шучко чер деч  йӧршын эмлалт шуктымо йӧн але уке, тудо илышланат лӱдыкшым луктын кертеш. Икмыняр жап гыч йочан вӱржым уэш тергеныт. Ты ганаже чыла сайым ончыктен. Тылзе коден, вич гана тудо вӱрым сдатлен - чер лийын огыл. Йоҥылыш ыштыме але вес еҥын дене лугымо анализ ача-авалан мыняр тургыжланымашым луктын, шинчавӱдыштым йоктарен. Сандене лабораторийыште ыштыше-влакын пашашт моткоч  ответственный.

- Ондак чынжымак мыланна нелырак лийын, шукыжым шканна ышташ логалын, – ойла Шернур рӱдӧ райбольницын клинический лабораторийыштыже ыштыше 21 ий паша стажан лабо- рантка Л.Ворончихина. – «Тазалык» национальный проект почеш налме оборудованийлан кӧра пашана ятырлан куштылемын. Результат компьютереш возалтеш, сандене йоҥылыш огеш лий гаяк. Иктаж-могай умылыдымаш лектеш гын, вӱрым уэш тергаш налыт.

Тыште кумытын: врач Э.Курочкина, лаборантка-влак Л.Ворончихина ден О.Ведерникова - тыршат гынат, паша лыҥак уло.  Кечыгут 150-270 наре  анализым ыштат. Нунын деке вӱрым поликлиника да стационар гыч гына огыл, Казанский, Кукнур эмлымверла гычат кондат.

Людмила ИВАНОВА