Рӱдӧ да Юл кундем МРСК-н «Мариэнерго» филиалжын Клиент-влаклан полшышо рӱдерже пашажым кумдаҥден.

Тыште ынде электросетьыш технологически ушнаш йодмашым пуаш, электровий йӧрталтме амал да аварий лийме жап нерген рашемдаш веле огыл, тыгак республикысе тӱрлӧ энергокомпанийын пашаж нерген пален налаш лиеш. Клиент-влак дене пашам ыштымылан «Мариэнергошто» кугу тӱткыш ойыралтеш. Тидлан тыште 2008 ийыште лӱмын рӱдерым почмо. Тудын пашаеҥже-влаклан электровийым сайын да ӱшанлын ситарен шогымо йодышлан мутым кучаш ӱшаныме. Тылеч посна рӱдерыште компанийын сетьышкыже ушнаш йодмашым погаш тӱҥалме.

А таче тыште «Мариэнерго» дене кылдалтше веле огыл, республикысе моло энергокомпаний нергенат уверым налаш лиеш. Электросетьын пашаштыже иктаж-могай экшык палдырна гын, «шокшо линий» телефон дене йыҥгыртен, тудын амалже да кунам кораҥдалтмыж нерген рашемден кертыда. Компанийын могай услугым да могай условий дене пуымыж денат «Мариэнергон» сайтыштыже палдарыме.

- Мемнан задачына – потребитель-влак дене кылым пеҥгыдемдаш. Пырляште кеч-могай йодышым писын да сайын решатлаш лиеш, - ойла «Мариэнерго» директорын вияҥме да услугым пуымо шотышто алмаштышыже Игорь Киселёв. – Да пуымо услугынат кумдаҥ толеш. Таче ме клиент-влакын йодмышт почеш электровийым коммерчески шотлышо ушан системым шындена, шотлышо приборым уэш программироватлена, моло йодыш дене ой-каҥашым пуэна да кертме семын полшена.