Увер-аҥар: Искусствым йӧратыше-влаклан — кугу пӧлек
Кӱкшӧ искусствым жаплыше зрительым тений
октябрьыште, у театр тургымым почмо жаплан, кугу событий вуча: Йошкар-Олаште
опера да балет театрын у полатше почылтеш.
Полатын кӧргыштыжӧ отделочный паша шукталтеш. Кондиционирований да пуракым кораҥдыме системым вераҥден шуктымо, манаш лиеш. Вӱдыжгылыкат нормылан келшыше лийшаш, вет театрыште моткоч шергакан семӱзгарым — органым — вераҥдат. Лишыл жапыште мебельым да моло материалым кондышаш улыт.
Специалист-шамыч залым чиялташ тӱҥалыт. Интерьер ужарге-шӧртньӧ тӱсан лиеш. Шӧртньӧ чия дене чиялташ кӱкшӧ мастарлык кӱлеш. Ты пашам маляр огыл, а художник-влак шукташ тӱҥалыт.
Отделка пашаште шукыжо пӱртӱсысӧ кӱм: мраморым, гранитым, змеевикым — кучылтмо.
Эше тыгай кугу ойыртемым палемдыман: оркестровый ямым, тудын кӱваржым, кӱлеш годым посна механизм полшымо дене кӱшкӧ нӧлталын, зритель залын ужашышкыжат савыраш лиеш. Тыге 500 веран зритель зал эше 100 верлан ешаралтеш.
Театрысе помещений-влакым ончен лекмеке, Л.Маркелов чоҥышо организаций-влакын вуйлатышышт дене вашлийын мутланен. Тудо палемден: «Чоҥаш гын, курымлан. Мемнан тукым веле огыл, ончыкылык у тукымат, ты театрыш коштын, пайремым шижше, чын искусство дене пойдаралт куаныже».
Каҥашыме годым Леонид Маркелов ӱшандарен каласен: ты объектым чоҥаш окса полыш ончыкыжат жапыштыже ойыралташ тӱҥалеш.
М.Васильев.
Д.Речкинын фотожо.
Возен admin- Онченыт: 28 гана
