Шернур районышто илыше-влак У ий вашеш сай пӧлекым налыныт – РФ Пенсий фонд управленийын у зданийже почылтын

Кызыт марте тудо ондаксе ПМК-н зданийыштыже, посёлкын рӱдыж деч тораште, верланен. Ялла гыч толшо-влаклан веле огыл, Шернурышто илышыжланат тушко логалаш неле лийын.

У зданийым автовокзал деч тораште огыл чоҥымо. Ынде тушто моткоч йоҥгыдо, йӧнан. Икымше пачашыште клиент служба вераҥын. Толшо-влакым вашлияш посна кабинка-влак улыт,  черетым вучышо-влаклан верым келыштарыме. Инвалид-шамыч нергенат монден огытыл. Нунышт районышто кум тӱжем наре улыт. Коляска дене коштшо-влак пандус дене куштылгын кудал кӱзат, нунылан кабинкымат йоҥгыдыракым ыштыме.

- Пенсий фондын у зданийыш куснымыжлан ме моткоч куаненна, - ойла Российысе пенсионер-влак ушемын районысо отделенийжым вуйлатыше Н.Лутошкина. – Ынде ял гыч толшо-влак, автовокзалеш волен, писын тушко миен шуыт. Пенсионер-влаклан сай йӧным ыштымыштлан  тауштена.

Людмила ИВАНОВА

Снимкыште: Шернур райо­нысо администрацийым вуйлатыше Н.Лебедев, РФ Пенсий фондын Марий Элысе отделенийжым вуйлатыше В.Орехов да Шернур районысо управленийым вуйлатыше В.Максимова – у зданийым почмо годым.