У идалык тӱҥалтыште кажне гана ме Христос шочмо лӱмеш пайремым куанен вашлийына. Тудо шарнымашеш утларак кодшо да калык коклаште поро шӱлышым шараш полшыжо манын, тӱрлӧ оҥайым ышташ тыршена.

Морко кундемыште илы­ше-влакын ты шотышто шкешотан йӱлашт уло.  Теният тудо шукталтде ыш код. 7 январь эр йӱдым поселкысо калык пайрем службыш шуко погынен ыле. Черкыш пурымаште кажныжым оҥай выставка шке сӧраллыкше дене ӧрыктарен. Тушто уло районысо школла гыч йоча-влакын тыршен ыштыме пашашт ончыкталтын. Чылажат ойыртемалтше сынан лийын, кугу кумыл дене, чон канен ыштыме шижалтын. Санденак кажне арверже – рожким шӧртнялге тӱсыш чиялтен ыштыме але пластик кленча гыч пӱчкеден лукмо кожшат, лум курчакым ушештарыше фигурыжат, шӱртӧ гыч ыштыме моткочак сӧрал шар кӧргысӧ суксыжат – шкеж деке сымыстарен, кучен ончымак шуын. Тыге куандарен моштеныт изи падыраш-влак шке мастарлыкышт дене.

11 шагат кечывалым Морко поселкышто Рушарня школыш коштшо-влак  калыкым пайрем концертыш чумыреныт ыле, тыште нуно шке усталык моштымашыштым сцена гоч ончыктеныт. А кас велеш Моркысо Богоявлений черке пеленсе Рушарня школыш коштшо-влак Волжск олаш кудалыныт. Тушто весела Рошто бал эртен.

Э.ИМАНАЕВ.