У ий пӧлек

Татарстан кундемысе марий-влак У ийлан ойыртемалтше пӧлекым налыныт.

Агрыз районысо Буймо ден Менделеевск районысо Элнет ялласе книгагудылаш марла книга-влак толыныт. Нуным Российын сулло артистше, кумдан палыме марий флейтист Виталий Шапкин шкенжын книгагудыж гыч У ий саламлымаш дене пырля колтен. «Тыгай чапланыше еҥын пӧлекшым кидыш кучаш поснак куанле», - маныт лудшо-влак.

Вер чылаштлан сита

Куженер район, Ӱштымбал кундемыште изи икшывыштым кушан кодымо шотышто ача-ава-влакын вуйышт корштымым чарнен.

«Кече» йоча сад ынде кок пачаш кугемын. Тушто эше тӱрлӧ ийготан ик группым почаш йӧн лектын. Ынде чылаже 36 йоча ӱштымбал гыч гына огыл, воктенысе Чарнур, Нурсола, Чодыраял гычат тышке коштыт.

Шке жапыштыже тыште кок пачашан чапле типовой садик лийын. Икшыве шагалеммылан кӧра вара тудым петыреныт. Ик группым почаш йӧн лектын, но садикыш икшывыштым колташ кумылан-влак ятырын лийыныт. Район администраций  эше ик группылан ешартыш пӧлемым олмыкташ оксам муын. Кызыт чыла йочалан верым ситарыме.

 У еш шукырак шочын

Эртыше ийыште У Торъял районышто 120 у еш шочын. Тидыже ончылийсе деч кумло утлалан шукырак.

Самырык еш шукырак чумыргымылан кӧра икшыве-влакат утларак шочыныт. Районысо загс отделенийыште талук жапыште 192 икшывым регистрироватлыме. Эрге икшыве ӱдыр-шамыч деч латкумытлан шукырак шочын. Ныл ава иканаште йыгыр йочам ыштен. Ныл ешыште нылымше йоча, а кок ешыште визымше икшыве ош тӱням ужыныт. Чаманен каласыман, нылле куд мужыр ойырлен. Южо ешыже ик ийым гына илен шуктен. Ойырлышо коло вич ешыште ийготыш шудымо икшыве лийын. Тидымат палемдыман: колышо-влак шочшо-шамыч деч ончычсо семынак шукынрак улыт. Кодшо ийын районышто 260  еҥ илыш дене чеверласен.

Пӧлекым кучыктеныт

У ий пайрем кажне айдемылан могай-гынат ончыкылык ӱшаным пуа.

Теве декабрь мучаште Волжский районышто калыкым обслуживатлыше рӱдерыш 3 гыч 15 ияш марте кап-кыл да уш-акыл дене начарын вияҥше 60 йочам ача-аваж дене чумыреныт. Йӱштӧ Кугыза ден Лумӱдырлан икшыве-влак почеламутым каласкаленыт, мурым муреныт. У ий пайрем веселан эртен.

Тыгай тӱшкаш пурышо районысо 92 йочалан шере пӧлекым кучыктеныт.

Утларак йӧнан лийын

Курык марий район, Микрак да Пайскырык селалаште кодшо ий мучаште ялысе модельный библиотека-влак почылтыныт.

Верысе бюджетла гыч нине биб­лиотекын материально-технический базыштым саемдаш 300  тӱжем теҥгем ойырымо, книгам налаш – 45 тӱжем теҥгем. Ынде кажне библиотекыште компьютер, ноутбук да оргтехника уло, Интернет дене пайдаланаш лиеш. У мебельым налме. Лудмо пӧрт-влакын оралтыштым ачалыме. Библиотека-влакын фондышт у литература дене пойдаралтын. Тыге ты кок селасе библиотека увер да культура рӱдерыш савырнен, образцовый радамыш пурен.

«Йочалан ӧрыктарышым пӧлекле»

Тыге маналтын У ий вашеш эртарыме поро кумыл акций. Тушко «Марий энергосбыт компаний» ЗАО-ат шке надыржым пыштен.

Компанийын пашаеҥже-влак йорлын илыше ешла гыч йоча-влаклан пӧлекым налаш оксам погеныт. 44 килограмм шере пӧлек Еш ден йоча-влаклан полыш рӱдерыш пуалтын. Рӱдер директор Галина Пахмутова тудым уло кумылын налын да Марий энергосбыт компанийлан порын тауштен. Тиде тауштымашке вара пӧлекым налше йоча-влакат ушненыт.