Тиде ӱдырлан Шочынава чыла пуэн: чатка кап-кылым, мотор сын-куным, яндар йӱкым. Поро кумылжат лыҥак шижалтеш. Калыкын йӧратыме мурызыжо лияш манын, чыла тидыже моткоч кӱлеш.

 -Эстрада мурызо лияш йоча годымак шонен пыштенам, — ойла Катя. — Шернур район, Кукнурышто верысе йоча садыште, а вара школышто концертлаште муренам. Кукнур школышто музыкым туныктышо Людмила Аркадьевна Фёдорова дене изиэм годымак усталык кылна пеҥгыдемын. Мый почеламутым возенам, а тудо семым пыштен. Икымше мурем «Ава» маналтын.  А кудымшо классыште мылам Звенигово интернат-школышто тунемаш логалын. Черлырак лийынам, да тушко эмлалташ колтеныт ыле. Но  муро дене кылым кӱрлын омыл. Тудо жапыштак Йошкар-Олаште республика кӱкшытан «Самырык тукым» конкурсышто шкемынак возымо «Йолташ-влак» муро дене икымше верыш лектынам ыле.  Вара угыч  Кукнур школыштак тунемаш тӱҥальым, — каласкала Катя. — Кандашымше классыште угыч  «Самырык тукым» конкурсышто вийым тергышым. «Шошо пагыт» муро дене кокымшо верыш лектынам ыле. Семжым Людмила Аркадьевна Фёдорова возен.

 Муро толкынеш вӱдылалтше ӱдырын шонымаш икте веле лийын: эстрада муро корным ойырен налаш. Тыге тудо 2006 ийыште   И.Палантай лӱмеш культура да искусство колледжын эстрада сем искусство отделенийышкыже тунемаш пура. Уста педагог-влак мастарлыкшым шуареныт. Эн ондакше Марий Элын сулло артистше Александр Фисенко дене тунемын. Чаманаш логалеш, ты уста педагог илыш дене чеверласен. Туддеч вара Катям Марий Эл культурын сулло пашаеҥже Л.В.Кренёва туныкташ тӱҥалын. Лариса Васильевна марий ӱдырлан тӱнямбал конкурсыш каяш корным почын.

Редакций деч: материалым мучаш марте луднеда гын, 2011 ий 11 январьысе "Марий Эл" газет номерым але газетын PDF электронный версийыжым лудса.

Электронный подписке нерген ешартыш информацийым http://www.mariel.org.ru/podpiska/4145-jelektronnyjj-podpiska.html интернет лаштыкыште муаш лиеш.

 Ю.Григорьев.

 Снимкыште:  Катя Михайлова — Чехийыште тӱнямбал фестивальыште лиймыж годым (2010).

 (Фотом мурызын еш альбомжо гыч налме.)