"Зарни зардон" - удмурт йылме гыч марлашке кусараш гын, "Шӧртньӧ ӱжара" лиеш. Эр ӱжара дене чыла ылыжеш. Тӱня илышлан куаныме, йӧратыме кумылжым почеш, чыла сылным, моторлыкым мокта.

Ӱжара - тиде самырык пагыт, у кече да пайрем.

18-20 мартыште лач тыгай лӱман фестивальышкыже Удмурт Республикысе культура колледж уна-влакым пагален ӱжын. Тиде фестиваль-конкурс Юл гыч Урал кундемла йотке  усталык шӱлышан студент коллектив-шамычым йырже чумырен. Воткинск, Можга (Удмурт Республика), Бор (Угарман область), тыгак Саранск, Киров, Челябинск, Алабога олала гыч коллектив-влак да Йошкар-Ола гыч И.Палантай лӱмеш культура да искусство колледжын самырык артистше-шамыч -  Российын шым регионжо гыч 14 тунемме заведений гыч 300 утла студент -  усталыкым тергыме таҥасымашке ушненыт.

Куандара: мемнан студентна-шамыч кугу кӱк-шытыштӧ лийыныт, лауреат лӱмым да икымше-кумшо степенян диплом-влакым сеҥен налыныт. Конкурсышто мемнан колледж гыч эн ончыч Вероника Наймушина (хор отделенийыште тунемеш) мастарлыкшым почо. Тудо руш фольклор дене кылдалтше номерым ончыктыш (туныктышыжо - О.Н.Данилова). Мурызо кумшо степенян диплом дене палемдалте. Туддеч вара сценыш,  марий вургемже дене волгалтын, йӱксӧ семынак Оксана Ермакова ийын лекте. Марий мурым йоҥгалтарыш. Ну, мастар! Кокымшо вер дене палемдалте. Ӱдырым Марий Эл культурын сулло пашаеҥже С.В.Чернова мураш туныкта.

"Келшымаште - вий!" куштымаш программым хореографий отделенийын 2 курсыштыжо тунемше студент-шамыч темлышт. Нуно чыланат "Вдохновение" куштышо ансамбльын участникше улыт. Коллективым Марий Эл культурын сулло пашаеҥже О.П.Сергеева вуйлата. Куштызына-влакын фестивальыште сеҥымашышт - икымше степенян диплом! Ме нунын верч пешак тургыжланышна. Но ӱдыр-рвезе-шамыч кумылнам ышт волто.

Юлия Медведева - "калык инструментальный творчество" отделенийын икымше курсшын студенткыже, кӱслезе. Конкурслан неле произведенийым ойырен налын. И.Пахельбельын "Чакона" произведенийже дене икымше степенян дипломым да лауреат лӱмым сеҥен нале.  Юлиям  сылне марий калык семӱзгар дене самырык туныктышо М.А.Эльтемерова шокташ туныкта.

Тыге иктешлымашым ышташ лиеш: мемнан колледжыште, чынжымак, шӧртньӧ самырык тукым тунемеш. ™дыр-рвезе-шамыч усталыкышт дене Ижевскысе зрительым куандарышт. А фестиваль-конкурсыш тыге лектын коштмаш тӱрлӧ калык коклаште келшымаш кылым пеҥгыдемда, самырык тукым  икоян лиеш да усталык сеҥымашыш шуаш ончыкыжат тыршаш тӱҥалеш.

Р.Сапаева.

Снимкыште: "Зарни зардон" фестивальыште - И.Палантай лӱмеш культура да искусство колледжын студентше-влак.

(Фотом колледжын альбомжо гыч налме.)