Август мучаште Шап ер воктене республикысе  электроэнергетика комплекс предприятий-влак коклаште йӱлаш пурышо спартакиада эртен

Тенийсе таҥасымаш Рӱдӧ да Юл кундем МРСК-н "Мариэнерго" филиалжын, 5-ше ТГК-н "Марий Эл ден Чуваший" филиалжын Йошкар-Оласе   2-шо ТЭЦ-шын да "Мариэнергосбыт" ОАО-н представительже-влакым чумырен. Тыгодымак "Мариэнерго" деч иканаште ныл команда лийын - управленийын да Йошкар-Ола, Шернур, Курык марий элек-тросеть-влакын.

Энергетик-влак спортын куд видше - футбол, волейбол, куштылго атлетика, ӱстембал теннис, шахмат, кира спорт - дене таҥасеныт. Ончычсо семынак спартакиада кандырам шупшмо дене почылтын. Ты вид, тӱшка зачётышто шотыш налалтын огыл гынат, таҥасыше-влак коклаште чолгалык дене пырля порылык тулым ылыжтен. Нунын ойлымышт почеш, таҥасымашын тӱҥ шонымашыжат марий энергосистемысе чыла пред-   приятий коклаште ваш умылымаш ден порылык кумылым да тазалыкым пеҥгыдемдыме дене кылдалтын. Шукышт тышке ешышт дене пырля толыныт, нунышт таҥасыме кумылым нӧлталаш полшеныт.

Куштылго атлетика дене кум видыште вийым тергаш - кужытыш тӧршташ, шӱдӧ метрым да кум (пӧръеҥ-влак) але ик (ӱдырамаш-влак) километрым куржаш - кӱлын. Иктеш шотлымаште Курык марий электросеть икымше верым налын. Тудын шахматистше-влакат талырак лийыныт.

Волейбол дене финалыште Йошкар-Ола ден Шернур электросеть-влакын командышт вашлийыныт. Ялысе-влак виянрак улмыштым ончыктеныт. Тусо теннисист-влакат сайынрак модыныт.

5-ше ТГК-н представительже-влак футбол дене талын модмыштым ончыктеныт. А кирам нӧлтымаште Йошкар-Ола электросетьын капитанже Александр Гордеев нигӧ деч виян лийын.

Чыла результатым иктешлымеке, "Мариэнергон" сборныйжо икымше верыш лектын, кокымшо верым 5-ше ТГК да кумшым "Мариэнергосбыт" налыныт. Манмыла, сеҥалтше лийын огыл. Энергетик-влак кокласе келшымаш сеҥен!

Ю.Исаков.